• Register

Melur News

மேலூர் அருகே கார்த்திகை திருவிழா மணலை மலை போல குவித்து வழிபடும் வினோத வழிபாடு

மேலூர் அருகே நேற்று மணலை மலை போல குவித்து வழிபடும் வினோத கார்த்திகை திருவிழா நடைபெற்றது.

கார்த்திகை திருவிழா

மேலூர் அருகே உள்ள நரசிங்கம்பட்டி பெருமாள் மலை அடிவாரத்தில் உள்ளது மலைச்சாமி கோவில். இங்கு ஆண்டு தோறும் கார்த்திகை திருவிழா சிறப்பாக கொண்டாடப்படுவது வழக்கம்.

இந்த வருடத்திற்கான விழா நேற்று நடைபெற்றது. அதில் பல்வேறு மாவட்டங்களை சேர்ந்த ஆயிரக்கணக்கானோர் கலந்து கொண்டனர். இந்த கோவிலில் உள்ள சாமிக்கு உருவ வழிபாடு இல்லை. பெருமாள் நின்று காட்சியளித்த படிக்கட்டுகளில் தான், பொது மக்கள் மாலைகள் வைத்து வணங்கி வருகின்றனர்.

மணல் மலை

இந்த கோவிலின் முன்பாக சேங்கை எனப்படும் தீர்த்தக்குளம் உள்ளது. சாமி தரிசனத்திற்கு முன்பு இந்த குளத்தில் பக்தர்கள் நீராடிவிட்டு, குளத்து மணலை 3 தடவை கையால் அள்ளி கொண்டு போய், கோவில் அருகே உள்ள ஒரு குறிப்பிட்ட இடத்தில் போட்டு வினோத வழிபாடு செய்வார்கள். இவ்வாறு செய்தால், தாங்கள் நினைத்தது நிறைவேறும், நல்ல மழை பெய்து, விவசாயம் செழிக்கும் என்பது ஐதீகம்.

அதன்படி பல நூறு ஆண்டுகளாக இந்த கோவிலுக்கு வரும் பக்தர்கள், குறிப்பிட்ட அந்த இடத்தில் போட்ட மணல் தற்போது 50 அடி உயரத்துக்கு பெரிய மலை போல நிரந்தர மணல் மலையாக அமைந்துவிட்டது. மழை காலங்களில், பெருமாள் மலையில் இருந்து பெருக்கெடுத்து வரும் மழை வெள்ளத்தின் போதும் கரையாமல், இந்த மணல் மலை அப்படியே இருப்பது குறிப்பிடத்தக்கதாகும்.

சேங்கை வெட்டுதல்

பக்தர்கள் குளத்து மணலை எடுத்து மணல் மலை மீது போட்டு செய்யும் வினோத வழிபாடு சேங்கை வெட்டுதல் என்று அழைக்கப்படுகிறது. குளத்தை தூர்வாரி மழை நீரை சேமிக்க வேண்டும் என்பதை, பல நூறு ஆண்டுகளுக்கு முன்பே இந்த சேங்கை வெட்டும் நிகழ்ச்சி மூலம் வலியுறுத்தப்பட்டுள்ளது.

கார்த்திகை விரதம் இருக்கும் பக்தர்கள், திருவிழாவின் போது சேங்கை குளத்தில் படர்ந்து கிடக்கும் தாமரை இலைகளை பறித்து சென்று வீட்டில் சாமி கும்பிட்டு, உணவு சாப்பிடும் விரதம் விடும் முறையை கடைபிடித்து வருகின்றனர்.

மேலூர் பகுதி விவசாயிகள் தாங்கள் பயிர் செய்த கரும்புகளை முதலில் இந்த கோவிலில் கொண்டு வந்து விற்பனை செய்வது ஐதீகம். பக்தர்கள் இந்த கரும்புகளை கோவில் பிரசாதமாக கருதி போட்டி போட்டு வாங்கி செல்வது வழக்கம். அதுபோல நேற்றும் கரும்பு விற்பனை அதிக அளவு நடைபெற்றது. இந்த விழாவிற்காக மேலூரில் இருந்து சிறப்பு பஸ்கள் அதிக அளவு இயக்கப்பட்டன. விழாவிற்கான பாதுகாப்பு ஏற்பாடுகளை மேலூர் போலீஸ் இன்ஸ்பெக்டர் ராமநாராயணன் தலைமையில் செய்யப்பட்டு இருந்தது.

 

Source: http://www.dailythanthi.com/News/Districts/Madurai/2016/12/12230833/Near-Melur--Nov-festival--As-the-sand-hillAmassed.vpf

சங்கரலிங்கம் கோயிலில் 108 சங்காபிஷேக விழா

மேலூர் அருகே உள்ள தும்பைப்பட்டி சிவாலயபுரத்தில் அமைந்துள்ள  சங்கரலிங்கம் சாமி கோயிலில் கார்த்திகை சோமவரத்தை முன்னிட்டு 108 சங்காபிஷேகம் நடைபெற்றது. தும்பப்பட்டி சிவாலயபுரத்தில்  சங்கரலிங்கம்,  சங்கர நாராயணசாமி,  கோமதியம்மன் கோயில் உள்ளது. இக்கோவிலில் கார்த்திகை மாதத்தில் வாரந்தோறும் சங்காபிஷேக விழா நடைபெற்று வருகிறது. கடைசி வாராமான நேற்று சிவனுக்கு முன்பு 108 சங்குகளை கொண்டு சங்காபிஷேக நிகழ்ச்சி நடைபெற்றது. இதனை தொடர்ந்து சிறப்பு பூஜைகள், அலங்கார ஆராதனைகள் நடைபெற்றன.

விழாவிற்கான ஏற்பாடுகளை குருக்கள் ஹரிஹரன், விழா குழுவினர் கண்ணதாசன், பாண்டி, செல்வம், மோகன், அங்கப்பன், தேவதாஸ், சுந்தரராஜன், சிவராமன், சங்கரன் வகையறா பங்காளிகள் செய்திருந்தனர்.

 

Source: http://www.dinakaran.com/District_Detail.asp?Nid=660144

Melur Links

Get it on Android Playstore

Likeus On Facebook